تۆ ئێستا له‌ ناوه‌وه‌ نيت ! چوونه‌ ناوه‌وه‌

کۆبونەوەیەکى هاوبەش

کۆبونەوەیەکى هاوبەش

•    لە ڕۆژى 5 شەممە ڕێکەوتى 2016/8/18 کاتژمێر 11ى پێش نیوەڕۆ  کۆبونەوەیەکى هاوبەش لە نێوان هەردوو(( یەکێتى و سەندیکا))ى ئەندازیارانى کوردستان لە ئوتێل ماریانا لەشارى هەولێر سازدرا، بەمەبەستى گفتوگۆکردن دەربارەى ژمارەیەک بابەت  و وەرگرتنى هەڵوێستى هاوبەش لەبارەیانەوە.
•    سەرەتا ئەندازیار عبدالرحمن على کوردە نەقیبى سەندیکاى ئەندازیاران، بەخێرهاتنى میوانەکانى کرد.
•    دواتر ئەندازیار ڕەنج عبدالحمید سەرۆکى یەکێتى ئەندازیاران سوپاسى پێشوازى و میواندارى کرد و بابەتەکانى کۆبونەوەکەى باس کرد کە بریتى بوون لە:


 1.باس کردن لە کارکردن بۆ دروستکردنى شارى ئەندازیاران لەلایەن یەکێتى ئەندازیارانى کوردستانەوە بۆ ئەندازیاران لەشارى سلێمانى و هەنگاو و هەوڵەکان بۆ سەرخستنى ئەو پڕۆژەیە. و دوورکەوتنەوە لەهەڵە و کەموکوڕى لەگەڵ کۆمپانیاى ناوبراودا لە گرێبەست و مەرج و جۆرى کەلوپەل و ...هتد بۆئەوەى هەڵەى سەندیکاى ئەندازیاران دووبارە نەبێتەوە.
2.  بابەتى  ئەندازیارانى کەرکوک، کە لەلایەک سەندیکاى ئەندازیارانى عێراقى هەوڵ دەدات کە هەڵبژاردنى لقى کەرکوکى ئەندازیاران بکات و بەو پێیەش ئەندازیارانى کەرکوک دەچنە سەر سەندیکاى ئەندازیارانى عێراق و بارەگاى لقەکەش دەبێتە بارەگاى لقى کەرکوکى ئەندازیارانى عێراقى، بەڵام هەڵوێستى هەریەکە لە لقى ((یەکیتى و سەندکا)) ى ئەندازیارانى کوردستان و  ئەندازیارانى تورکومان پێچەوانەى ئەو هەوڵەن.
هەربۆیە  هەردوولا جەختیان کردەوە لەوەى کە هەردوو لقى(( یەکێتى و سەندیکا)) هەوڵى خۆیان بدەن بۆ چارەسەرى ئەو بابەتە بە بەرژەوەندى ئەندازیارانى کورد و مەسەلەى کەرکوک کە  مەسەلەیەکى گەورە و گرنگ و نەتەوەییە و ناکرێت سازشى لەسەر بکرێت و هەموو ڕێو شوێنێک بگرنە بەر بە ئاگادارى هەردوو ((یەکێتى و سەندیکا)) ى ئەندازیارانى کوردستان و لە ئەنجامدا کۆبونەوە هەڵوێستى هاوبەشى هەردوولایان ڕاگەیاند و بڕیاریاندا کە:
 
1.هەڵبژاردنى لقى کەرکوکى ئەندازیاران نەکرێت کە سەندیکاى ئەندازیارانى عێراقى هەوڵى بۆ دەدات.
2. هەوڵ بدرێت دەستەیەکى هاوبەش لەنێوان هەموو پێکهاتە نەتەوەییەکانى کەرکوکدا دروست بکرێت بۆ ڕاپەڕاندنى ئیشوکارە پیشەییەکانى ئەندازیارانى کەرکوک لەلایەن سەندیکاى ئەندازیارانى عێراقیەوە ، بەمەرجێک هەر پێکهاتەیەک بە 2 نوێنەرى بەشدار بێت و ئاشوریەکانیش بە 1 نوێنەر و هەر ڕێکخراو و سەندیکایەکیش سەربەخۆیى خۆى بپارێزێت.
3. هەموو چارەسەریەکان بەو ئاڕاستەیە بن کە تا کێشەى کەرکوک  کە کێشەیەکى سیاسى و نەتەوەییە چارەسەر نەکرێت لە چوارچێوەى مادەى 140 دەستورى هەمیشەیى عێراقدا بۆ جێگە کێشە لەسەرەکان، کێشەى لقى کەرکوکى ئەندازیارانیش چارسەر نەکرێت.

 
•    تایبەت بە بابەتى  بەستنى کۆنگرەى هاوبەش و یەکگرتنەوەى هەردوولا(( یەکێتى و سەندیکا))ى ئەندازیارانى کوردستان، لەگەڵ ئەوەى هەردوولا جەختیان کردەوە لەسەر یەکگرتنەوەى هەردوولا و نیەتى ڕاستگۆیانە بۆ ئەو مەبەستە ، بەڵام بەهۆى شڵەژانى دۆخى سیاسى و قەیرانى دارایى و ناجێگیرى دۆخى ئەمنى لە هەرێمدا ، بۆیە هەردوولا ڕێکەوتن لەسەر ئەوەى کە بەستنى کۆنگرەى یەکگرتووى هاوبەش دوابخرێت بۆ کاتێکى گونجاوتر تا سەرجەم دۆخەکان ئاسایى دەبنەوە ، بەڵام هەوڵەکان بۆ تەواوکردنى ئامادەسازیەکان بەردەوام بێت.
لەکۆتاییدا کۆبونەوە جەختیان لەکارى هاوبەش و هەمئاهەنگى زیاتر و بەردەوامى نێوان هەردوولا کردەوە لە پێناو بەرژەوەندى ئەندازیاراندا. جێگەى باسە کۆبونەوەکە تا کاتژمێر 1ى پاشنیوەڕۆى خایاند.
 



گۆڕانكاری
ئه‌م بابه‌ته‌ دانراوه‌ له‌ لايه‌ن : zardasht | له‌ به‌رواری : 2016-09-25 07:37:09
مافی ئه‌م بابه‌ته‌ پارێزراوه‌ بۆ يه‌كێتی ئه‌ندازيارانی كوردستان © ٢٠١٠